(NJ) Scho lang ischs här, wo mr s letzte offizielle Regioturnfest, oder überhaupt e Turnfest, kah hei. Am 17. und 18. Juni 2022 ischs endlich widr so witt gsii. Dr TV Zwinge het uf sine Ahlage s 11. Regioturnfest, also s Turnferst vom Laufetaler Turnverband zämmä mit em Regionale Turnverband Dorneck-Thierstei, duregfiehrt, wo au vieli usswärtigi Verein teilgnoh hei. Sogar usem Thurgau isch me ahgreist, um sich das Fest nitt go loh entzgoh.
Am Fritig, 17. Juni 2022, isch Lichathletik einzeln und Getu zu Zweit ufem Programm gstande. Zwoii Aktiv Turner, 1 Juniorin, 2 Jugend A Turner, und 1 Jugend A Turnerin hei in jewils 4 usgwählte LA einzel Diszipline ihr chönne unter bewiis gstellt. Mit Sprints wie Geparde und Witsprüng wie Kängurus hei sii volle Ihsatz zeigt und sind prompt drfür belohnt worde: 1. Platz in Jugend A Fraue vodr Jane mit 1875 Pünkt, 1. Platz in Jugend A Männer vom Florian mit 2585 Pünk und e Uszeichnig bide Jugend A Männer vom Roman mit 1959 Pünkt hei ihdrücklich zeigt, dass do in de kommende Johre e risigs Potential umme isch. Die ältere LA einzeln Startende hei nur stuunend chönne zue luege und miesse sich in acht neh, dass sie nit direkt überholt werde wode jüngere Turnerinne und Turner.
Im Getu zu Zwoiit sind d Jana und Muriel am Bode und im Schuelstuefebarre gstartet, wobi letsteres klar ihr Lieblingsgrät isch. Es isch schnell klar gsii, für wer die meiste Zueschauer cho sind, het sich d Turnhalle doch jewiils grad gfüllt, wo si im Ihsatz gsii sind. Und es het sich definitiv für alli glohnt. Mitere Note vo 9.77 am SSB heisi die besti Vorfiehrig vo allne a dem Grät zeigt. Schlussendlich sind si nur vode Dauerrivale us Fränkedorf gschlage worde und hei dr 2. Platz erreicht. Top!
Notürlich hei au do e paar Bierli nit dörfe fehle und me het die erste Medallie gebührend gfiihrt.
Am nächste Tag, em 18. Juni 2022, ischs am 8i am Morge direkt witergange mitem Gymnastik Chliifeld, wo dr Start vo oisne 3-teilige Vereinswettkämpf ihglüttet het. Au wenn genau die Musik dr ganz Frittig lange gnutzt worde isch für Tests, hets genau dere Musik e Problem geh und die erste paar Sekunde hei gfehlt. D Note vo 9.11 zeigt, dass das de erfahrene Turnerinne keini witere Problem geh het und, dass es e sehr glungeni Vorfiehrig gsii isch.
Nochem anschliessende Vereinsfoti hets für die meiste e chlini Pause geh bis am 10ni, wo mit dr Gymnastik 35+ e vollpackts Programm gstartet het. Im Stundetakt het me bis am 4ri am Nomitag die diversiste Diszipline vom TSV Röschenz chönne go luege, mitfiebere und ahfüühre. Die viele Zueschauer, wo extra für ois sind cho luege, hei alli Turnende sehr gfroit, het me sich doch lange vorbereitet kah für de grossi Ahlass. D Note zeige denn au direkt die super Leistige: Gymnastik Chliifeld 9.11, Gymnastik 35+ 8.87, Fachtest 35+ 9.53 – wobi die 2. Ufgabe miteme glatte 10 bewältigt worde isch, Pändelstafette 35+ 10, Pändelstafette Aktivi 8.90, Fachtest Aktivi 8.20, Grätekombination Aktivi 9.13, und Gymnastik Bühne Team 9.41. Bsunders d steigerig vom Getu isch beachtlich; sit Ewigkeite endlich widr die besti Aktivriegi.
So verwunderets au nitt, dass grad 3 Riegene im Final vodr Verbandsmeisterschafte chönne teilneh: Gymnastik Chliifeld, Gymnastik 35+ und d Grätekombination. Me het vor no viel mehr Publikum die beste Vorfiehrige nomol dörfe zeige und somit dr 2. und 4. Platz in dr Gymnastik, sowie dr 3. Platz im Gräteturne chönne hole.
Churz vor dr Verbandsmeisterschaft isch no dr Fahnelauf duregfiehrt worde. Mit oisere neue Fahneträgerin – dr Jasmin – simr wie immer z vorderst drbii gsii und hei die knapp 50 Fahne chönne bestuune bim Sprint über d Wiise. Sichtlich isch dr eint odr ander Fahneträger drbii scho gmässigt ahgsüüselet gsii.
Direkt im Ahschluss vom letzte Uftritt het au s wohlverdiente Bier nitt dörfe fehle und dr turnerisch/sportlich Teil vom Regioturnfest isch zum festlich Teil übergange. Au dass d Temperatur langsam zrugg gange isch, isch sehr willkommen gsii. So ischs gege Obe nur no sehr heiss und nümmi sehr sehr heiss gsii. D Duschi mitere Wassertemperatur churz überem 0 Punkt isch dodrbii abr doch chli krass gsii.
Gspannt het me im Festzält uf d Rangverkündigung gwartet, het me doch d Resultat vode Gegner nonig kennt. Miteme 9.41 im Gymnastik Team het me dr 1. Platz in dere Kategorie ghol, miteme 26.69 im 3-teilige Vereinswettkampf Aktivi isch me widr mol dr besti Laufetaler Verein gsii und isch 9. vo 34 worde und miteme sagehafte 28.40 im 3-teilige Vereinswettkampf 35+ hei mr endlich widr mol dr 1. Platz im 3-teilige Vereinswettkampf chönne hole. Herrvorragend und herzlichi Gratulation an alli beteiligte!
Mit dr Ueli’s Familty Band und em DJ Dave S het me die jääse Resultat au gebührend chönne fiihre.
