(NJ) Am Samstig, 2. Oktober 2021, hei sich 9 Turnnerinne und Turner in aller Herrgotsfrieh ufem Dorfplatz z Röschenz troffe für die diejörigi, neu uferstandeni, Turnfahrt vom TSV Röschenz.
Nochere gmietliche 1.5 stündige Zugfahrt isch me mehr odr weniger wach in Burgdorf ahcho: dr richtigi Start vodr Turnfahrt. Nochere kurze stärkig vom Coop mit Schoggiweggli, O-Saft, oder Smirnoff ice het d Wanderig ahgfange. Dr Organisator het dodrbi immer widr betont, dass es e gmietlichi, fast ebeni Wanderig würdi geh wo mehrheitlich uf breitere wätterfeste Weg isch.
Es isch keini 10 Minute gange, wo scho gseit worde isch, dass siige viel steileri, ahsträngenderi, und ängeri Wägli als dass do versproche worde isch. Vorallem dr Ufstiig imene Bachbett isch do nitt so witzig ufgnoh worde wie erwartet. Abr wie vieli Sache, isch das mitem Beschriibe vode Wäg wohl eher e subjektivi Sach.
Noch 3.5 Stund wunderschönem wandere durchs Emmetal mit Znünipause, Zänipause, Ölfipause, Mittagspause, Bierli, em vorbiilaufe vom wohl grösste Hienerhüüsli wos gitt, und em Gniesse vodr Ussicht vom einzige Hügel im Emmetal, em Lueg, simr im Heimatort vonere teilnehmende Turnerinn, in Affoltere i.E. ahcho. No schnell an dr Viehschau vorbii und scho hei mr d Hornussahlag Rüegsau-Affoltern gfunde.
Vom Fritz und sinere Frau sind mr sofort sehr härzlich willkomme gheisse worde. Es het e ihfiehrig gäh über s Hornusse, de unzählige Begriff für jede Gegestand wo verwändet wird und dr Spielwiis. Nocheme Vorzeigeschlag wo gege die 300 Meter wit gfloge isch sind denn endlich mir an dr Reihe gsii. Ein nochem andere het die Nouss in Acker bänglet. Me het miesse feststelle, dass das ganze wesentlich eifacher usgseht wieme dänkt het, so dass no Mänge mehreri Versiech brucht het. Sichtlich Spass hets allne gmacht! D Turnerinn und dr Turner mitem witiste Schlag hei als Ahdenke am Schluss e Hornuss becho (Näme wei mr do keini erwähne, well dr Turner mitem witiste Schlag nur e Glückstäffer verwütscht het).
Noch guete zwoii Stund het me zämmä no öpis drunke, über e eigeni turnvereininterni Ahlag in Röschenz Oberdorf fantasiert, wome denne die Hornüss ins Unterdorf oder sogar Laufe chönnti schloh, und diskutiert wie me nächst Johr e Turnfahrt chönnti mache, wome chli weniger würdi ufelaufe. Letzteres isch wie zuvor erwähnt eher e subjektive Ihwand gsii. So schöns gsii isch, het me sich langsam ufe Heiweg miesse begeh. Nochem dritte mol umstiige isch plötzlich e Idee ufcho: Me chönnti doch no ans FC Zwinge Festli goh, hei mrs doch grad alli so lustig zämmä. Gesagt, getan. So het me bis spoht ind Nacht no chli gfiihrt und es isch scho fast chli Turnfestfeeling ufcho.
Uf die nächsti Turnfahrt freut me sich scho jetzt.
