(NJ) Am 29. August 2020 hei sich die Aktive vom TSV Röschenz zämmä mit de 8. und 9. Klässler vo dr Jugi ufem Dorfplatz troffe. Me het sich hallo gseit und uf die no drei fehlendi aktiv Mitglieder gwarted mitem wüsse, dass me als Start vo dem Ahlass wider direkt bi dene dreine wird durelaufe zum dr nächsti Hiwiis z finde. Dementsprächend zrugghaltend isch denn au d Freud vo dene dreine gsii, wosi ufem Dorfplatz ihtroffe sii und vo dem erfahre hei. S Wüsse übere nächsti Hiwiis het sich durch e Bild ergäh, wo s Chrütz im Ziilwäg darstellt.
So isch me zum erste Ort gloffe wo ufeme Bild z gseh gsii isch und het dert au scho s nächste Bild vomene speziellere Ort in Röschenz gfunde. Uf dr Rücksitte vo de Bilder sind jewiils Buechstabe gsii, wo am Schluss – in richtiger Reihefolg – euse Ziilort ergeh hei. So sind noch und noch Buechstabe uftaucht, zerst e „A“, denne „E“, „O“, und nomoll e „A“. Vieli Idee sind cho, was das am Schluss chönnti heisse, so isch au d Möglichkeit ufcho, dass dr Macher vo dem ganze sich e Scherz erlaubt het und dr Ziilort effach falsch gschriibe het, ala „HOUS“, anstell vo „HAUS“, was notürlich Gugus isch.
Noch ölf witere coole Ort in Röschenz, wo trotz em Wätter allisammt sehr schön gsii sind, isch me widr bim Dorfplatz glandet und het me endlich alli Buechstabe zämme kah zum d Ziildestination usezfinde. Noch eingem hi und her isch denne mol s Wort „SOMMER“ erkannt gsii, woruf au grad „TABEA“ grueffe worde isch. „Tabea Sommer“? „Het do öper z mizt in Röschenz e Home-Party organisiert?“ isch denkt worde. Doch das het sich als falsch usegstellt, d Tabea Sommer het e wiitere Hiiwiis kah, wele mitem letzte zämme denne s Wort „Röschenzer Schützenhaus“ bildet het, was denn doch chli mehr Sinn ergeh het.
Am Ziil ahcho, het me sich hiigsetzt, e Iistee oder e chlises Corona-Bier trunke und anschliessend perfekt gmachti Steaks vom 3-Sterne-GaultMillau-Grillör Gunti gesse. Während em Esse, ischs wie scho zuvor uf dr Wanderig, zu spannende Konversationen zwüsche de Aktive und de Jugendliche cho, so dass sich spötistens am Endi vom Obe alli gegesittig kennt hei. Dodrbii dörf notürlich au d Ihfiehrig ins Spiel „Meier“ oder „Mäxle“ nitt fehle, was noch dem Obe au alli ältere Jugichinder druff häi.
A dem Punkt wätti au speziell nomol dr Jasmine Halbeisen danke füre ussergwöhnlich super mega guet jääse Hörnlisalat. Viele Dank!
Eis vode Highlight isch jedoch gar nonig zum Zug cho. Keini Ufwänd sind gscheut worde zum dr Ruum ihne höchst professionelli Club-Rave z verwandle: Tischbombe, Lüchtstäbli, Lüchtbänder, Musikahlag, Bass-Box, Stroboliecht, Disco-Chugele, Bass-Gschtüürti-Lasershow, Virgin-Cocktails für die Minderjährige und eis-zwoi Bierli für die Erwachsene hei s Schützehüüsli zumene Danzende Hexechessel verwandlet.
Bis tief ind Nacht isch gfiihrt worde und s einzige wome am Schluss ghört het vode Lüt isch „das miesse mr ab jetzt all paar Mönet mache“! I dem Sinn ischs e super erfolgriiche Nochwuchstag gsii wo sowohl älter Jugichinder, wie au die Aktive öpis drvo kah hei und d Turnerfamilie witer gwachse isch.
