Am 16. – 17. Juni 2023 het in Breitebach s dasjöhrige Regioturnfest vom Laufetaler Turnverband und em Turnverband Dorneck-Theirstei stattgfunde. S erste mol in dr Gschicht ischs vo zwoii Verein us beidne Turnverbände, Grellige und Breitebach, organisiert worde und dr Ahklang isch sehr gross gsii, was me am Samstig bide guet 2000 Trunende vodr ganze Schwiiz und sogar vo Dütschland gseh het.
Gstartet het für ois das Turnfest am Frittigobig mitem LA Einzel, Getu zu Zwoit und em Getu Chliiteam. Sowohl oisi durchtrainierte Liichtathlethe wie au oisi immer zur Favorite ghörende Getu Turnerinne sind heiss gsii ufe Wettkampf.
Im Kugelstosse, Wiit- und Hochsprung, Wurfkörper, Schleuderball, 1000 Meter und notürlich dr Paradedisziplin em 80 Meter heisi ihrdüklich s Könne unter Bewiis chönne stelle. Dodrbii hets au nüt gmacht, dass oise Schleuderballprofi d Konkurenz mit sinde Würf het welle vode Zueschauerplätz wegschmättere, me erinnere sich zrugg an Liesber wo die besagti Person schomol s Kampfrichterzelt abgruumt het mit sinere Wucht. Platz 1 für d Jana, Uszeichnig füre Mathis und d Leonie, sowie s sehr knappe Verpasse vode andere Startende vonere Uszeichnig zeige s Chönne.
Miteme 9.12 und em 4. Platz isch dr ersti Start vom Getu Chliteam au glunge gsii und miteme 18.86 und zwoi Mol voller Punktzahl bim Programm hei d Jana und s Muriel widr mol mit grossem Abstand dr 1. Platz im Getu zu Zwoit gholt kah. Erfolgriche Start chönnt me sege.
Am Samstig ischs witergange mit de 3-teilige Vereinswettkampf und em Verbandsturnfest. Letztere isch dr Wettkampf unter de Laufethaler und Schwarzbuebe elei und macht dr Regiosiger us.
Gstartet bide Aktive sind mr mit de alltbekannte Gymnastik Bühni, Gymnastik Chliifeld, Gerätekombi und dr Pändelstafette, wo mr das mol sogar e Sprint Röschenz gege Röschenz kah hei, well mr so viel gsii sind. Miteme 9.19 isch oisi GYB die besti Riigi gsii und e 2. 9ni isch knapp verpasst worde vode andere. Do sii im Allgemeine sehr sträng gwärtet hei und zwoii sehr frogwürdigi Gymnastik Wärtigsgricht kah hei, wo die einte konstant besser benotet worde sind, hei mr am Endli glich dr 4. Platz vo 29 Verein eroberet in dr 2. Stärkeklass mitere Note vo 26.05 und sind 2 Mol als 2. ins Final vodr Verbandsmeisterschaft cho mitem GYB und em Getu. Dört het sich jedoch nümi viel gänderet und me het dr 1. Platz jewiils knapp nitt chönne hole.
Aus oisi 35+ Fraue hei e super start kah am Heimturnfest und sind 7. vo 21 worde mit ere Note vo 27.37, was mehr als e 9ner Schnitt isch, wobi d Pändel e gschwings 9.31 usebetoniert het, stark! Au do isch d Gymnastik widr sehr hart bewärtet worde, was durchus au ihri Berechtrigung im Final vom Verband kah hätt!
Nochem Turne isch vorem Fest, wie oises Motte jo all Johr isch und me het noch de Finalrundene endlich chönne zämmä ahstosse und de heissi Tag lo usklinge bim einte odr andere Bierli odr au Wasser. Gfestet het me anschliessend im Festzelt, wo me scho fast vergesse het, dass me amene Regioturnfest isch, so gross ischs gsii und d Stimmig het die vom letzte Johr definitiv chönne übertreffe.
An dere Stell möchti au nomol allne Wertigs- und Kampfrichtende e riise Dank usspreche, ohni oich gechs nitt. Au allne Turnende und Untersütztende isch e jääses Kompliments z geh, so viel Zueschauer wo mr hei dörfe ha und sone grosse Zämmähalt findet me wohl in nitt so viele Verein. Lit af, wie die Junge würde sege. Dodrmit simr guet ihturnt parat gsii fürs nächste Turnfest, s TBOE in Wange.
Nicolas Jermann, TSV Röschenz
