(NJ) S Trainingsweekend vode Aktiv het vom 2. ufe 3. April in Willisau stattgfunde, wie immer. Besammlet het me sich bide MZH z Röschenz, um denne mit de Autos zu de Trainingsahlage z fahre, wie immer. Ahcho, sind alli Usseahlage unterer 20 cm tiefe Schneeschicht bedeckt gsii und d 0 Grad Marke isch nur knapp übertroffe worde, nitt wie immer. So het me in dem Johr sogar em Lichtathletik e paar Lektione in dr Halle gwährt.
Nocheme super Trainingstag mit super Ihturnlektione undeme eifache Lunch vor de Halle sind vorem Znachtesse die einte no go dr Frauehandballmatch luege während dem die andere no e sehr sehr churze Abstächer ins Hallebad gmacht hei, bevor me endlich s wohlverdiente Duschbier in dr Hand gha het.
E Znachtesse wie im Drei König het me zwar nit erwartet, abr e Wucherückblick bi völlig verkochtem Uflauf und ere Schuehsoleschnitzel mitere versaltzene Pilzrahmsauce isch de Vorstellige denn doch aunit ganz grecht worde. Aus s Birchermieslidessert, wo mr zum Zmorge nomol gseh hei, isch nitt ganz dr Hammer gsii. Allerdings het das Ganze durchus au vorteil gha, so isch me schneller in dr allziitberiehmte Sport Rock Bar glandet.
E paar gmietlichi Bierli, lustigi Gspräch und chli Darts, Töggele oder Billiard het dr Zämmähalt und d Freud füre Turnverein nur no mehr gstärkt, und, dass Single-Rock-Night isch het me höchstens bine paar urchige Landjugend Dudes gmerkt. Au die gmeinsame Schnüpf hei notürlich nitt dörfe fehle. Am Schluss sind sogar die letzte ganz ahständig uf die halb 2i in dr Unterkunft gsii, e Probesitze uf Gartelounges und e paar Schneeengeli inklusive.
Dr Sunntigmorge isch, ebefalls wie all Johr, viel z frieh cho. Abr nochem Zmorge sind die meiste widr fit gsii fürs scho fast Wältberiehmte «Sunntigs-Morge-Ihturne-Mit-Dr-Angi», wonoch definitiv alli fit gsii sind. D Gymanstik Bühne isch durche Fachtest ersetzt worde und me het nomol e intensive Trainingsmorge kah, bevor me sich widr ufe Weg gmacht het füre Atomschutzbunkter, wo mr gesse hei. Doch dasmol hets ois alli chli Überrascht, s Riis Casimir isch völlig ok, wenn nitt sogar scho recht guet gsii.
Wie immer sind mr sehr wiit Vorwärts cho in de verschiedene Riegene, so dass dr diisjährige Turnfestsiig nur no proforma Sach cha sii. Bis zum nächste Johr.
