Am Samstig, 22. April hei sich die aktive Turnerinne und Turner vom TSV Röschenz uf die halb 8i bi dr MZH z Röschenz besammlet. Alli si voller Vorfreud ufs diesjöhrige Trainingsweekend gsi. Me het sich uf d Autos ufteilt und isch uf diräktem Wäg uf Willisau gfahre. Dört acho het me sich scho nach churzer Zyyt parat fürs erschte gmeinsame Iwärme gmacht. Nach emene lustige Chatz und Muus Spiel und em aschliessende Chräbbslisitzball mit 37 Turnende i einere Halle hei sich die verschiedene Riegenä au scho ufteilt und mit em spartespezifische Training agfange. Au wenn’s nach sage und schreibe 20 Minute dr ersti Unfall gä het, will e neus aber gfährlichs Teili usprobeirt worde isch, si alli sehr produktiv gsi und guet vorwärts cho. Nach emene eifache Lunch vor dr Turnhalle a dr Sunne ischs am Nomitag den au scho wiiter gange. Es hei sich wieder alli zämme mit enerä super Iturnlektion warm gmacht und den nomol dr Nomitag lang Vollgas gä. Nach däm asträngendä Tag hei sich den alli ufs Znacht gfreut. Nachdäm sich alli parat gmacht hei und d Zimmer bezoge worde si, hei sich d Turner*inne au scho ufe Wäg id Pizzeria gmacht. Uf em Menü isch e gmischte Salat , feini Pizzene zum drilänge und e Tiramisu zum Dessert gstange. Leider het das ganze die meiste aber nid ganz gsättigt. Trotzdem si den alli gli drufabe die allziitberiehmte Sport Rock Bar gloffe. Einigi Rundene Bowling und lustigi Gspröch hei dr Zämmehalt und d Freud füre Turnverein ufs neue gstärkt.
Dr nerchst Morge isch, wie all Johr, viel z früeh cho. Nach em Zmorge uf die halb 8i sie den aber alli wieder parat für s beriehmte Sunntigmorge Ihturne vo dr Angi gsi. Me het nomol e intensive Trainingsmorge gha, bevor me sich ufe wäg zum Mittagässä gmacht het.
Wie immer i de Trainingsweekends si alli Riegene sehr wiit vorwärts cho, und es isch e gueti Vorbereitig uf die diisjährige Turnfest gsi.
Nicolas Jermann, TSV Röschenz
